ANTROIDO EN CAJAMARCA

O “Carnaval de Cajamarca” serviunos para dúas cousas:

a)      Estrear as gafas de bucear que Miri leva cargando 4 meses na mochila

b)      Comprobar que o Antroido non se celebra en ningún lado como en Galiza!!!!

Como poderedes ver, os disfraces de mochileiros son bastante precarios e desacordes co resto dos disfraces tradicionais pero isto non evitou que nos integráramos á perfección no pasarrúas (no que fumos toda una atracción) e que o pasáramos moi ben aínda que chegamos para os últimos días das festas: o día do velorio e o día do enterro do Ño Carnavalón, que é o que enterran aquí en vez da Sardiña, do Meco….

Aparte do Antroido Cajamarca ten outras cousas interesantes… aquí foi onde Francisco Pizarro capturou, enganou e asasinou ao último Inca* Atahualpa no ano de 1532, con isto comezou a derrota do Imperio Incaico. Os únicos restos Incas que quedan na cidade son o “Cuarto del Rescate” e os “Baños do Inca”, onde o Inca ía tomar baños termais e onde nos tamén fumos por o corpo a remollo.

Tamén hai por aquí restos preincaicos, as chamadas “Ventanillas de Otuzco” un camposanto un tanto peculiar xa que os mortos metíanse en  xanelas excavadas nas rochas. Este cemiterio pertence á cultura Caxamarca. Como podedes ver non todo é Inca en Perú xa que por cada lugar que pasamos atopamos unha cultura nova para nos.

Incluímos nesta entrada unha foto dunha moto-taxi, un medio de transporte moi utilizado en Perú, económico e incómodo ademáis de pouco estable e moi ruidoso que inundan as rúas de un montón de cidades deste país. Tamén unha foto dunha nova froita: a guaba ou pacay, unha vaina xigante cunha pulpa de sabor similar ao melón.

* O Inca e o nome que tiña o "rei" ou "emperador" do pobo inca. Só había un Inca, que críase fillo do Sol. O uso do termo inca extendeuse para referirse en xeral ao resto de individuos do pobo e a súa cultura. 

Como din os Quempallou... "tamén na foliada hai que coidar a nosa terra"