Caminho á Selva: parada Kuélap

Esta entrada vai practicaménte monotemática xa que dende que escribimos a última vez pasamos dous días enteiros en medios de transporte de camiño á selva (á que non chegamos), aínda que xa se nota a proximidade pola calor e a paisaxe.

En medio desta odisea pasamos un día na pequena aldea de Tingo. Por máis que repetimos e repetimos que estamos fartos de montaña e camiñatas e  que queremos ir á praia, podédesnos ver unha vez máis “pateando” montaña arriba para chegar ata as ruínas da ciudadela de Kuélap.

Estas ruínas, pertencentes á cultura Chachapoyas, datan do 500 d. C. e estiveron habitadas ata 1538, pasando por elas tanto os Incas coma os Españois. Como veredes nas fotos as vivendas deste lugar son moi parecidas ás dos castros galegos. O lugar é de película, un motón de ruínas cheas de vexetación no curuto dunha montaña, un dos restos arqueolóxicos máis fermosos que visitamos ata o de agora.

Agora estamos en Tarapoto continuando a viaxe cara Iquitos. Non sabemos cando chegaremos pero cremos que imos estar incomunicados uns días, así que xa teredes novas nosas dende aló.

Saudos a tod@s!!!